ⴰⵎⵣⵔⵓⵢ ⵏ ⵜⵎⴷⵉⵏⵜ ⵏ ⵍⵇⵏⵉⵟⵔⴰ

ⵓⵔ ⵜⵔⵉⵏ ⵜⵉⵏⵏⵉ ⵎⴰⵙ ⵜⴳⴰ ⵍⵇⵏⵉⵟⵔⴰ ⵢⴰⵜ ⴳ ⵜⵎⴷⵉⵏⵉⵏ ⵜⵉⵎⵇⵇⵔⴰⵏⵉⵏ ⵏ ⵍⵎⵖⵔⵉⴱ ⴷ ⵜⴰⵎⵇⵇⵔⴰⵏⵜ ⴰⴽⴽⵯ ⴳ ⵓⴳⴰⴼⴰ-ⵓⵜⵔⵓⵜ ⵏ ⵜⴳⵍⴷⵉⵜ.

ⵜⵍⵍⴰ ⵅⴼ ⵜⵎⴰⵔⵏⵉⵜ ⵏ ⵉⴼⴼⵓⵙ ⵏ ⵙⴱⵓ, ⵖⵔ 12 ⵏ ⵉⴽⵉⵍⵓⵎⵉⵜⵔⵏ ⵙⴳ ⵜⵉⵎⵍⵍⵉⵜ ⵏⵏⵙ ⴳ ⵓⴳⴰⵔⴰⵡ ⴰⵟⵍⴰⵏⵟⵉ ⵍⵍⵉⴳ ⵜⵍⵍⴰ ⵎⵀⴷⵉⵢⴰ, ⴷ ⴳ ⵓⵎⵢⴰⵡⴰⴹ ⵏ ⵉⴱⵔⴷⴰⵏ ⵉⵎⵇⵇⵔⴰⵏⵏ ⵏ ⵜⵙⴰⵖⵓⵍⵜ ⵍⵍⵉ ⵉⵣⴷⴰⵢⵏ ⴰⵙⵓⵔⴰⴼ, ⴰⴳⴰⴼⴰ ⴷ ⵡⴰⵍⵎⴰⵙ ⵏ ⵜⴳⵍⴷⵉⵜ (ⴼⴰⵙ, ⵎⴽⵏⴰⵙ, ⵜⵉⵟⵟⴰⵡⵉⵏ, ⵟⴰⵏⵊⴰ, ⵕⵕⴱⴰⵟ ⴷ ⴰⵏⴼⴰ). ⵜⴳⴰ ⵜⴰⵎⴷⵉⵏⵜ ⵜⴰⵎⴰⵢⵏⵓⵜ ⴳ ⵓⵙⵏⵓⵍⴼⵓ ⵏⵏⵙ, ⴰⵎ ⵜⵎⴰⵣⵉⵔⵜ ⵜⴰⴷⴰⵎⵙⴰⵏⵜ.

ⴰⵎⵣⵔⵓⵢ ⵏ ⵍⵇⵏⵉⵟⵔⴰ ⵙ ⵉⵎⴰⵏ ⵏⵏⵙ ⵓⵔ ⵉⵣⴳⵉⵔ 120 ⵏ ⵓⵙⴳⴳⵯⴰⵙ, ⵎⵇⵇⴰⵔ ⵉⵇⵇⵏ ⵙ ⵜⵉⴳⵎⵎⵉ ⵏ ⵎⵀⴷⵉⵢⴰ ⵍⵍⵉ ⵉⴱⵏⴰ « ⵃⴰⵏⵓⵏ ⴰⵇⴰⵔⵟⴰⵊⵉ » ⴳ ⵜⵉⵙⵜ ⵏ ⵙⴹⵉⵚ ⵇⴱⵍ ⵜⵍⴰⵍⵉⵜ ⵅⴼ ⵢⴰⵏ ⵓⵙⴰⵢⵙ ⵏ ⵉⵥⵕⴰⵏ ⴳ ⵜⵉⵎⵍⵍⵉⵜ ⵏ ⵙⴱⵓ, ⵅⴼ ⵉⵎⵓⵔⴰ ⵏ ⵜⵎⴷⵉⵏⵜ ⵏ « ⵜⵉⵎⴰⵜⵔⵢⴰ ».

ⵜⵜⵓⵙⵙⵏ ⴷⴰⵖ ⵙ « ⵃⵍⵇ ⵍⵎⴰⵄⵎⵓⵔⴰ » ⴷ « ⵃⵍⵇ ⵙⴱⵓ », ⵜⵥⵕⴰ ⴰⵣⴷⴰⵢ ⴰⴱⵕⵟⵇⵉⵣ ⴳ 1515 ⴷ ⴰⵙⴱⵏⵢⵓⵍⵉ ⴳ 1614, ⴰⵔ ⴷ ⵜⵙⵙⵓⴼⵖ ⵓⵙⵍⵟⴰⵏ ⴰⵄⵍⴰⵡⵉ ⵎⵓⵍⴰⵢ ⵉⵙⵎⴰⵄⵉⵍ ⵜⵉⴳⵎⵎⵉ ⴳ 1681.

ⵙ ⵓⴽⵛⵛⵓⵎ ⵏ ⵓⵙⵎⵔⴰⵙ ⴰⴼⵔⴰⵏⵙⵉⵙ ⴷ ⵜⵃⵎⴰⵢⵜ ⴳ 1912, ⵉⴳⵣⵎ ⵓⵎⵙⵏⵜⵉ ⴰⵎⴰⵜⴰⵢ ⵍⵢⵓⵟⵉ ⴰⴷ ⵉⴱⵏⵓ ⵜⴰⵎⴰⵔⵙⴰ ⵖⵔ ⵜⵉⴳⵎⵎⵉ ⵍⵍⵉ ⵉⵜⵜⵓⴱⵏⴰⵏ ⴳ 1895 ⵉ ⵢⴰⵏ ⵓⴳⵔⴰⵡ ⴰⵙⵔⴷⴰⵙ, ⵖⵔ ⵜⵇⵏⵟⵕⵜ ⵍⵍⵉ ⵉⴱⵏⴰ ⵓⵇⴰⵢⴷ ⵄⵍⵉ ⵓⵄⴷⴷⵉ ⴳ ⵜⵉⴳⵉⵔⴰ ⵏ ⵜⵉⵙⵜ ⵏ 17, ⵜⵙⵙⵖⵓⵍ ⵜⵏⵏ ⵜⵏⴱⴰⴹⵉⵏ ⵜⵉⵎⵙⵎⵔⴰⵙⵉⵏ ⴳ 1928.

ⴰⵙⵖⵜⵉⵙ ⵏ ⵜⵎⵙⵏⵜⵉⵜ ⵏ 1 ⵉⵏⵏⴰⵢⵔ 1913, ⵍⵍⵉ ⵉⵕⵥⵎⵏ ⵜⴰⵎⴰⵔⵙⴰ ⵏ ⵓⵙⵉⴼ ⵏ ⵍⵇⵏⵉⵟⵔⴰ ⵉ ⵓⵎⵓⵙⵙⵓ ⴰⵙⵖⴰⵔⴰⵏ, ⵉⴳⴰ ⴰⵎⵓⵔⵙ ⴰⵎⵇⵇⵔⴰⵏ ⴳ ⵓⵙⵙⴷⵓⵙ ⵏ ⵜⵎⵓⵍⵉ ⵏ ⵜⵎⴷⵉⵏⵜ ⴷ ⵓⵙⵎⵖⵔ ⵏ ⵜⵓⵙⵙⵏⴰ ⵏⵏⵙ.

ⵜⴰⵎⴰⵔⵙⴰ ⴰⴷ ⵜⵍⵍⴰ ⴳ ⵜⵉⵣⵡⵓⵔⵉ ⵖⴰⵙ ⵉ ⵜⵡⵓⵔⵉ ⵜⴰⵙⵔⴷⴰⵙⵜ : ⴳⵉⵙ ⴰⵙ ⵜⵜⵙⵙⵓⴼⵓⵖⵏ ⵉⵎⵙⵔⴷⴰⵙ ⵏ ⵓⵙⵎⵔⴰⵙ, ⵉⵎⴰⵙⵙⵏ ⵉⵙⵔⴷⴰⵙⵏ ⴷ ⵜⵉⵙⵖⴰⵡⵉⵏ, ⴰⵔ ⵜⵏⵜ ⵜⵜⴰⵣⵏⵏ ⵖⵔ ⵡⴰⵍⵎⴰⵙ ⵏ ⵜⵎⵓⵔⵜ ⵙ ⵉⴱⵔⴷⴰⵏ ⵏ ⵎⵅⵣⵏ, ⵃⵎⴰ ⴰⴷ ⵙⵅⵙⵉⵏ ⵜⵉⵏⴽⴽⵔⴰ ⵜⵉⵖⵔⴼⴰⵏⵉⵏ.

ⵜⵓⵙⵙⵏⴰ ⵏ ⵜⵎⴰⵔⵙⴰ ⵜⴳⴳⴰ ⵉⵙⵓⵔⴰⴼ ⵉⵖⵓⴷⴰⵏ ⴳ ⵓⵙⵙⵉⵡⴹ ⵏ ⵉⵙⵓⴳⵓⵔⵏ, ⵙ ⵓⵎⵓⴽⵔⵉⵙ ⴳ ⵜⵙⵏⴰⵡⵜ (ⵉⵎⵜⵜⵉⵜⵏ, ⵜⴰⴽⵉⵎⵢⴰⵡⵜ, ⵉⵏⴰⵥⵕⴼⵏ) ⴷ ⵓⴱⵏⴰ. ⵜⵉⵎⵔⵡⵉⵙ ⵉⴷⵔⵓⵙⵏ, ⵉⵅⵍⵍⵚⵏ ⵉⴷⵔⵓⵙⵏ ⴷ ⵜⵙⵔⴰⴳ ⵏ ⵜⵡⵊⴰ ⵜⵜⵓⵡⵙⵏⵜ ⴳ ⵓⵙⵏⴼⴰⵔ ⴰⴷ ⴰⵙⵉⵏⴰⵡⴰⵏ.

ⵉⵙⵏⴼⵍⵏ ⴰⴷ ⵉⴷⴰⵎⵙⴰⵏⵏ ⵙⵙⵉⵡⴹⵏ ⵖⵔ ⵜⵎⴷⵉⵏⵜ ⴰⵏⴳⵓⵜ ⵏ ⵉⵎⵖⵔⵉⴱⵉⵢⵏ ⵙⴳ ⴽⵓ ⵜⵉⵙⴳⴰ ⵏ ⵜⴳⵍⴷⵉⵜ, ⵙ ⵓⵎⵓⴽⵔⵉⵙ ⵙⴳ ⵜⵙⴳⴰ ⵏ ⵖⵔⴱ – ⵛⵕⴰⵕⴷⴰ – ⴱⵏⵉ ⵃⵙⵏ, ⴰⵢⵏⵏⴰ ⵢⵓⵡⵉⵏ ⴰⵎⵖⵉ ⴰⵎⵇⵇⵔⴰⵏ ⵏ ⵉⵎⵣⴷⴰⵖ ⴷ ⵓⵙⵎⵖⵔ ⵏ ⵜⵎⴷⵉⵏⵜ. ⵜⵙⵙⵉⵡⴹ ⴷⴰⵖ ⵜⵎⴷⵉⵏⵜ ⴰⵟⵟⴰⵙ ⵏ ⵉⵕⵓⵎⵉⵢⵏ. ⴳ ⵜⵙⵔⵜⵉⵜ ⵏ ⵓⴱⵟⵟⵓ ⵏ ⵓⵙⵎⵔⴰⵙ, ⴱⴹⴰⵏⵜ ⵜⵏⴱⴰⴹⵉⵏ ⵏ ⵜⵃⵎⴰⵢⵜ, ⵙ ⵓⵎⵓⴽⵔⵉⵙ ⴹⴰⵕⵜ ⵏ ⵓⵙⵏⵓⵍⴼⵓ ⵏ ⵜⵎⵙⵙⵓⴷⵙⵜ ⵜⴰⵏⴱⴷⴰⴷⵜ ⴳ ⵜⵉⴳⵉⵔⴰ ⵏ 1914, ⵜⴰⵎⴷⵉⵏⵜ ⵖⵔ ⴽⵕⴰⴹ ⵏ ⵉⴳⵔⴰⵏ :

• ⴰⴱⵟⵟⵓ ⴰⵙⵔⴷⴰⵙ, ⵉ ⵜⵏⴰⴱⴰⴹⵉⵏ ⴷ ⵉⵎⵔⵙⴰⵍ ⵏ ⵓⵙⵔⴷⴰⵙ ;
• ⵜⴰⵎⴷⵉⵏⵜ ⵜⴰⵜⵔⴰⵔⵜ ⵉ ⵉⵕⵓⵎⵉⵢⵏ, ⴳⵉⵙ ⴷⴰⵖ ⵜⵉⵎⵏⴰⴹⵉⵏ « ⴼⴰⵍ ⴼⵍⵓⵔⵉ » ⴷ « ⵎⵙⵜⵄⵊⵍ » ;
• ⵜⵉⵎⵏⴰⴹⵉⵏ ⵏ ⵉⵎⵖⵔⵉⴱⵉⵢⵏ, ⵍⵍⵉ ⵓⵔ ⵖⵓⵔⵙⵏⵜ ⵉⵍⵍⵉ ⵉⵙⵡⵓⵔⵔⵉⵏ ⵉⵙⵍⵖⵓⵏⵏ, ⴳ ⵍⵍⵉⴳ ⵜⵍⵍⴰ ⵜⵏⵇⵇⵉⵡⵉⵏ, ⵢⴰⵏ ⵓⴳⵣⵣⵓⵎ ⵙⴳⵙⵏⵜ ⵉⵙⵙⵖⵓⵍ ⵜ ⵢⴰⵏ ⵓⴼⴰ ⴰⵎⵇⵇⵔⴰⵏ ⴳ 1946.